އެކުގައި ވަމޭ

 

އެކުގައި ވަމޭ ކާރީނެތަސް، އެކު އެބަހުރިން ދުރުގައިވިޔަސް.

     އެކުގައި ވުމަށް ހިތް އެދެވުނަސް، އެކުވެރިވުމަށް ބޭނުންވިޔަސް.

ފިރުމާ އުފާ ދޭން ބޭނުމަސް، ފިނިކަން ހިތަށް ދޭން އެދެވުނަސް.

     ފިކުރާ ޚިޔާލާ ގުޅުނަކަސް، ފިކުރާވެ ލާމެހި ގުޅިވިޔަސް.

ވާކަށް ނެތޭ ބޭނުން ވިޔަސް، ބަލި ހާލު އެނދުގައި އަދުއޮތަސް.

     ވާވަރު ބަޔާންކޮށް ނުދެވުނަސް، ބޭނުން ބުނަން ދެން ނުވެވުނަސް.

މިގޮތަށް މިހެން ކަންތައް އޮތަސް، މިތުރާ ލޮލަށްދެން ނުފެނުނަސް.    

     މިގޮތުގަ ހުރުން އަދު އުނދަގުލަސް، މިހިތަށް ތުރާތަށް އަދުވިޔަސް.    

ހިތުގަވި އެދުންތައް ނުފުދުނަސް، ހިތު އެޅި މިކަންތައް ނުމެވިޔަސް.

     ހިނިތުންވަމޭ ތިހަދާން ވިޔަސް، ހިތަކަށް ލިބެން އަދު ނުމެނެތަސް.

ބޭނުމޭ ދިނުމަށް އެކީގައި

 

ބޭނުމޭ ލޯބީގެ ފޮނިރަހަ އަރުތެރޭގައި ލެއްވުމަށް.

ބޭނުމޭ ތިޔަދޭ އިޝާރާތުގެ ޙަޤީޤަތް ފެނިލުމަށް.

ބޭނުމޭ ބުނެލަން ތިއޭ އަހަރެންގެ ހިތުގެ ޝިފާއަކީ.

ބޭނުމޭ އަބަދުމެ ލިބުން ތިޔަދޭ އުފާތަށް ޖާޒުބީ.

ދޭނެކަމުގައި ހުރެ މިތާ އުންމީދުތައް އާލާވެއޭ.

ދޭނަމޭ ތިބުނާ އުފާތަށް ހޯދުމަށް އެދި ހިތް ރޮއޭ.

ދޭހިތުންދޭ ކޮންމެ އެއްޗެއް ހެޔޮހިތުން ހޯދާނަމޭ.

ދޭދިނުން އަނބުރާ އެގޮތުގައި ހަމަ ތިބާއަށް ދޭނަމޭ.

ހިތު ވިންދު

 

 ހިތުގާ ހިނގާ ޝުޢޫރާ ގުޅިފައި ވެޔޭ ޚިޔާލާ

ހިތަކީ ނިކަން ލޮއީފީ ތަނެކޭ ބުނަން ދުރާލާ

ހިނިތުން ހިތައް އެގެނުވާ ބަސްތައް އެކުރުވި އަސަރާ

ހިނިއަންނަ ފަދަ ގޮތެއްގައި ހޭދަވި ރެއާއި ވަގުތާ

ހިތަކަށް ލިބޭނެކަމުގައި ބުނެހުރެ އެވީ އެ ވަޢުދާ

ހިތުގައި ވެޔޭ ކަނޑާނެގި ތިއަޑާއި އޭގެ އަސަރާ

ހިތުގާ މަގޭ ނުޖައްސާ ތިޔަހެން އުފާ އެ ދީފާ

ހިތު ވިންދަކީ މެ އަގުހުރި އެއްޗެއް ކަމަށް ބަލާލާ

ހިތިކަން ވަނީ އެ ލިބިފައި މިހަޔާތުގައި އުދާހާ

ހިތިރަހަ ފަދައިން އެރަހަވެސް ހިތުގައި ވެޔޭ ފުރާލާ

Quran Explorer

Quran Explorer

For those who are interested to recite Quran pls feel free :)

ދަންމަރު

އަލި ދަންމަރެއް ފަދައިން ތިމާ، ފަތުރާށެ ބިމުގައި އަލިކަމެއް.

އަލި ރަންމުތެއް ފަދައިން ވިދާ، ބަބުޅާށެ ނުމެގޮސް އޮފުކަމެއް.

ފިނިފެންމަލުގެ ދަސްތާ ފަދައިން، ފަތުރާށެ ތަނުގައި މީރުވަސް.

ފިނިފިނި ރަބީޢުގެ ވައިތެރޭން، ގެނުވާ އެ ގޮތުގައި މީރުވަސް.

ގެނުވާށެ ޝަބްނަމް ތިކިފަދައިން، މިބިމަށް އުފާވެރި ފިނިކަމެއް.

ގެނުވާ ގޮތަށް މިހިތަށް ދިރުން، ފެނުމުން ފޮޅިފަ ވާ މާތަކެއް.

ނުމެދީ ތަނެއް ކަޅުފޮއި ވުމަށް، ގެނުވާށެ ނަލަނަލަ އަލިކަމެއް.

ނުމެދާ ގޮތަށް އަދު ބީވެގެން، ގެނުވާށެ މިތަނަށް ފަރިކަމެއް.

ފަތިހަށް ފޮޅޭ މާތަށް ފަދައިން، އުޅެމާހެ ފަތިހާ ތެދުވެގެން.

.ފަތިހުގެ ފިނީގައި ދޫނިތައް، އުދުހޭ ފަދައިން ފިކުރާވެގެން       

ކިޔަވަން ހިނގާ

ޤުރުޢާން ބާވާލެއްވެވީ ރަމަޟާން މިމައްސަރު އޭ ބުނަން.

ޤުރުޢާން ކިޔެވުން އިތުރުކޮށް ހެޔޮޢަމަލުތައް ކުރުމަށް ބުނަން.

ފަސްނުކޮށް ގަޑިއަށް ހިނގާ ހުރިހާ ނަމާދެއް  ވެސް ކުރަން.

ފަހެ ނަސީބެއް ހަމަ މިލެއްވީ އިތުރު ދުވަހެއްގައި ހުރުން.

ޙަތިމެއް ކުރަން ވިސްނާ މިމަހުގައި ތެދުވަމާހޭ ދެން ނުތިބެ.

ހަށި ސާފުކޮށް ދުރުވަން ހިނގާ ޣާފިލްކަމުގަ ތިޔަހެން ނުތިބެ.

ވެއްޖޭ ކުރަން ގަސްދެއް ހިތުން މިކަމާމެދުގަ ހުރިހާ ކުދިން.

ވޭއްޖޭ ނުލާހިކު ޢަޒުމުގައި ކިޔަވަން ފޮތެއް ކެރިހުރެ ކުދިން.

ފަރުބަދަ ކަނޑާ ހިނިތައް ފަދައިން ތިބެމާ ހިނގާ ގަދަކޮށް ޢަޒުމް.

ސާބިތުވެ ހުރެ ނިޔަތާ ދުލުން ކިޔަވާ ށެދެން ގަދަކޮށް ޢަޒުމް.

ރަމަޟާން މުބާރިކް

ބަރަކާތް އިތުރު އެދިގެން ކުރޭ ހެޔޮހާ ޢަމަލު އޭމަގެ އަޙާ،

ބަނަވެވި ނުދާގޮތަކަށް ހަޔާތް އާރާސްތުކުރުމަށް މަގެ އަޙާ.

ސުލްހަވެ އެކީގައި ބަދަހިކޮށް ހީނަރުގުޅުންތަށް އޭއަޙާ،

ސުލްހަމަސްލަސްކަން އެގެނުއާ ގޭތެރޭގައި ވެސް އަޙާ.

ސުފުރާއެމަތި ޒީނަތްކުރަން ގިނަހޭދަތަށް ނުކުރޭ އަޙާ،

ސުރުހީ މައަޅަމޭ ވިސްނުމަށް މިކަމާމެދުގަ އޭމަގެ އަޙާ.

ބޭކާރު ކަމެކޭ ގިނަކުރުން ބާވަތް އިތުރު ލޮބުވެތި އަޙާ،     

ބާކީ ނުވާނޭހެން ތަކެތި ބޭނުންކުރަން ވިސްނާ އަޙާ.

އިސްރާފު ކުރުމަށް ކާތަކެތި ހެދުމުން މެ ގެއްލުންވޭ އަޙާ،

އިސްކުރާށޭ އަމަލުތަށް ސީދާކުރުން މިމައްސަރުގައި އަޙާ.

ހައި ހޫނުކަން އިޙުސާސްކުރުމުން ކެތްކުރަން ދަސްވޭ އަޙާ،

ހައިނުކޮށް ކުރުމުން މެ އަޅުކަން ފާހިޝްކަމުން ދުރުވޭ އަޙާ.

މަގު އެ ދައްކާ ނަފްސު ޠާހިރު ކުރުވައޭ  އޭމަގެ އަޙާ،

މަރުވަމުންދާ ނަފުސުވެސް ހޭލައްވައޭ މިކަމުން އަޙާ.

ޞަދަޤާތް އިތުރު ކުރުމީ މެމޮޅު ކަމެކޭ ކުރަން ބުނަމޭ އަޙާ،

ސާބިތުވެ ހުރެ ހެޔޮ އަމަލުތައް ގިނައިން ކުރަން ބުނަމޭ އަޙާ.

ރަމަޟާން އެމަސް ލައްވާފަވީ ދެއްވެވުމަށޭ ބަރަކާތް އަޙާ،

ރަމްޒީ ތަނެއް މީ ދުނިޔެއީ ބޭނުންހިފާ އަވަހަށް އަޙާ.